مقابلة مميزة مع أبلة العالم العربي "فاهيتا"!

مقابلة مميزة مع أبلة العالم العربي "فاهيتا"!

، الدمية المصرية الكرتونية والكوميدية الساخرة،هي دوماً مثيرة للجدل والإهتمام في آن معاً ، نظراً لجرأتها السياسية وإنتقاداتها الواسعة وإيحاءاتها المختلفة وأهمية المواضيع التي تتناولها والتي تلامس وجع الناس ومشاكلهم والأحداث والاطورات بأسلوبها المتميز الأقرب إلى الكوميديا السوداء.

 

والجرأة المتناهية التي ظهرت بها شخصية "أبلة فاهيتا" عرضتها للكثير من الإنتقاد والتجريح والحملات على مختلف مواقع التواصل الإجتماعي والمنابر من قبل شريحة واسعة من الناس في الوطن العربي،الذين يعتبرونها خروجاً عن المألوف وعن أدبيات المجتمع المصري والعربي وعاداته التي ترتكز على المحافظة.

 

وهذه الحملة العنيفة ضد أبلة فاهيتا عرضتها الى الكثير من الدعاوى أمام القضاء، لكنها كانت كل مرة تخرج من "المحكمة" أكثر توسعاً وإنتشاراً، دون أن تتخلى عن جرأتها وقفشاتها الاذعة والموجة، لأن الشعب بات يتعاطى معها كشخصية حقيقية وليس شخصية إفتراضية من نسج الخيال، كما أنهم أصبحوا ينظرون لها كإعلامية لها حيثيتها المهنية التي تعبر بصدق عن معاناتهم وهمومهم.

 

وعند كل توقف لحلقات "أبلة فاهيتا" كانت تعاود عروضها بنفس الزخم والحضور بعناد وتصميم وإرادة، مع إدخال تحولات لافتة، لتحافظ على البرنامج وعلى نجاحه وإنتشاره الواسع وجماهيريته.

 

"وفاهيتا" أبلة مصر الأولى وإذا صح القول أبلة العالم العربي أجمع، لم يعد يُنظر لها كمجرد دمية، بل باتت تشكل كشخصية معنوية حالةً قائمةً بذلتها لها كيانها الخاص، لا سيما وأن حلقات برنامج "أبلة فاهيتا" تتمتع بأعلى درجات المشاهدة الواسعة على الإطلاق،خصوصاً أن كل حلقة من حلقاتها تحمل في طياتها رسائل عميقة ذات دلالات ومضامين معبرة.

 

وبما أن "أبلة فاهيتا" أصبحت تشكل ظاهرة ملفتة وموضع إهتمام ومتابعة كبيرين من قبل المشاعدين والنقاد والمتابعين، فإن أبرز نجوم العالم العربي وشخصياته المؤثرة واللامعة لا يترددون ليحلوا ضيوفاً على البرنامج، رغم معرفتهم المسبقة بما سيخبئ لهم من مفاجاءات!

 

كان لـ Elle Arabia فرصة إجراء هذا اللقاء الشيق والمثمر مع هذه الشخصية الإستثنائية!

 

Elle Arabia: ما رأيك بما حققته ليومنا هذا من نجاح وشهرة هل أنت راضية؟

Abla Fahita: صحيح أنا أرملة فائقة النجاح وبقيت أيقونة مشهورة عند الستات وخصوصاً الأرشانات، بس دايماً فيه أكتر.. أنا نجاحي غير مسقوف.. سقف طموحي عالي لدرجة إني مش شايفاه.


Elle Arabia: ما رأي أبلة فاهيتا بموجة التواصل الإجتماعي؟ وما هو تأثيرها السلبي والإيجابي عليها؟

Abla Fahita: موجة التواصل الإجتماعي؟ ما التواصل طول عمره إجتماعي وموجود من ايّام إنسان الكهف.. زمان كانوا يتقابلوا يهمهموا مع بعض ويتواصلوا إجتماعياً عند الكهف، اليومين دول بيهمهموا مع بعض من على تليفوناتهم ويتواصلوا إجتماعياً برضك.. بس من على بعد.. هي دلوقتي موجة تواصل بس غير إجتماعي.. وأنا بخبرتي كمليونيرة ويبة.. بأشوف السوشال ميديا عملت لنا حالة تخمة إجتماعية.. شبعنا من بعض من بعيد لبعيد والزيارات عددها في النازل.. زمان كانت الواحدة تزور صاحبتها علشان تتفرج على فرش بيتها.. مشترياتها.. البوم صورها.. جوزها.. دلوقتي بقينا عارفين كل ده من فيسبوك وإنستجرام وكمان ريل تايم فخلاص هنزور بعض ليه.

 

Elle Arabia: هل على كل فنان أن يكون لديه صفحة على هذه المواقع وأن يتواصل بشكل مباشر مع متابعينه؟

Abla Fahita: كل فنان ونوعه.. ماهو الفنان ده على الأقل نصه انسان.. فيه منه الكسوفة وفيه منه المفتوح على الدنيا - او مفتوح على الجنب هاهاها - ومش لازم اللي يقدر يواجه الكاميرا يقدر يواجه الجماهير .. بس أرجع وأقولك مهم خالص للفنانين وجودهم أونلاين علشان يفضلوا على بال فاناتهم ومايتنسوشي.. فحتى لو الفنان ساكن في دوبلكس عاجي.. لازم يفتح فيه شباك تواصل مع فاناته.. يكلمهم منه ويسمعلهم.. وممكن يدلدل السبت لو عايز ينَزِّلهم حاجة.

 


Elle Arabia: ما هو سر جمالك وأناقتك الدائمة؟

Abla Fahita: ميرسي يا حبيبتي.. ده بس من ذوقي.. أنا أسرار جمالي كتيرة، وكلهم متبتة عليهم ومش هقول عنهم كلمة واحدة، تقدروا تعرفوهم لما أكتب كتابي الجديد: "رحلة جمالي .. من الديتوكسا للبوتوكسا".. أما بالنسبة لأناقتي ده مش سر.. فأنا متابعة جيدة لحفلات الأوسكار وبرنامج كلام نواعم وبأعرف أحدث صيحات الموضة بأختار منها اللي يعجبني وأحط عليها تاتشاتي وإنت عارفة معظم مصممين الأزياء أصحابي ولما يصدقوا يجاملوني بشغل إيديهم.

 

Elle Arabia: بنظرك، لماذا تهاجم أبلة فاهيتا؟

Abla Fahita: لأني جريئة.. وعلى رأي المثل الشجرة الجريئة هي بس اللي بتتحدّف بالطوب.

 

Elle Arabia: كيف تردين على من ينتقدك؟ وهل هناك من يغار من أبلة فاهيتا ونجاحها؟

Abla Fahita: الإنتقاد موجود علشان مايتردش عليه.. أما النقد فده أحب أسمعه علشان أشوف وجهات نظر تانية يمكن ألطش منهم نصيحة أجربها.. بالنسبة للي بيغيروا مني ومن نجاحي اكيد موجودين.. علشان كدة عملت تاتو عين زرقا يمتص الحسد والطاقة السلبية.. إسمحيلي مقدرش أقول مكان التاتو فين..

 

Elle Arabia: ثلاث كلمات تصفين نفسك بهم؟
Abla Fahita:
مم تلاتة بس؟ ده أنا كلي صفات.. أولهم متوهجة، متجددة وعاشقة لللوامع.

 

Elle Arabia: ما رأيك بالساحة الفنية اليوم، ومن يلفتك؟

Abla Fahita: ​​​​​​​الساحة الفنية دلوقتي حالها نص كم خالص وساعات چاپونيز حتى.. كل فين وفين بنشوف حاجة عِدلة.. المواهب موجودة بس للأسف مش في الساحة الفنية.. بس أنا حاسة من كتر كبت المواهب اللي حصل عندنا ده هيحصل إنفجار فني قريب.. أما عن اللي بيلفتوني.. بأحب حنجرة شيرين وأفلام مروان حامد ومزيكة حسن الشافعي وبرانيط بوسي شلبي.

 

Elle Arabia: كيف تقيمين فن الدمى كجزء من البرامج النقدية في الوطن العربي بالمقارنة مع البرامج المماثلة في الغرب؟

Abla Fahita: ​​​​​​​الظاهر الإنسان فى الوطن العربي زيه زي الإنسان الغربي في النقطة دي.. محتاج حاجة يستخبى وراها عشان يقول رأيه.. أنا مش مع الموضوع ده بصراحة.. المفروض اللي عنده حاجة يقولها، يواجه المجتمع ويقول اللي نفسه فيه من غير شغل العرايس والحاجات المرعبة دي.

 

Elle Arabia: ما رأيك بالمرأة العربية اليوم وما الذي يميزها عن المرأة الغربية؟

Abla Fahita: ​​​​​​​المرأة العربية يا حبيبتي مش ملاحقة.. بتجري على حقوقها كأنثى مستقلة بذاتها في بيتها ومجتمعها وفي نفس الوقت رامية ودن على الموضة الأوروبية عشان ماتفوتهاش قصة، وكل ده وهي بتقوم بمسؤلياتها كإبنة أو زوجة أو أم. المرأة العربية عندها إصرار وقدرة على الغزل برجل حمار مش موجودة عند المرأة المستوردة.. هي بس تأخد فرصتها وتوريكم العجب.. ومعروفة إن إسمها المرأة العربية علشان هي اللي سايقة عيليتها.

 

Elle Arabia: كشخصية مهمة ومؤثرة في الوطن العربي، ما هي رسالتك؟

Abla Fahita: ​​​​​​​انا رسايلي كتير، المهم ماتضيعش في البوسطة.. تحضرني دلوقتي مثلاً رسالة "حب إختلافك".. المجتمع صحيح بيطلع عينك لو إنت مختلف.. بس أول لما بتنضج وتكتشف حقيقة نفسك وشطارتك هتلاقي الإختلاف ده هو مصدر قوتك وسعادتك. إحنا لو بس نقَدَّر نفسنا بكل إختلافتنا عن بعضينا هنلاقينا كلنا حلوين وبنكمل بعض. وزي ما كل بصمة مش زي التانية.. مافيش قالب مريح للكل.. خليك نفسك وخلى غيرك يبقى نفسه.. وعلى رأي ناهد شريف المهم الحب.

 

Elle Arabia: من هو منافسك الأول؟ وكيف تتعاملين مع المنافسة؟

Abla Fahita: ​​​​​​​منافسي الأول هو نفسي.. بصراحة ملاقتشي أي منافسة تذكر في الوسط الفني كله ولا حتى على الأطراف.. فقررت أنافس نفسي وأتحدى نفسي وأتفوق على نفسي.. وبكده في كل الأحوال يبقى النجاح ليا أو لنفسي.. ولو حصل وظهر لي أي منافسين عندي الشيخ الألوسي بيعمل أعمال سحر تري أوريچينال.

 

Elle Arabia: هل يمكن لأبلة فاهيتا أن تدخل مجال التمثيل؟

Abla Fahita: ​​​​​​​التمثيل ده لعبتي.. بس المهم السيناريو اللي يستفز طاقتي الإبداعية.. أنا فاكرة وقت مسرح المدرسة، كنت بأقدر أعمل دور ديدمونة وفي لحظة أبقى ليدي مكبث.. كانت أيام.. لولاش بس ميس بياتريس طردتني من الفرقة المسرحية لما قلعت سلبوتة في عرض سالومي في حفلة نهاية السنة الدراسية.

 

Elle Arabia: ما تعليقك على التعليقات السلبية والنقد اللاذع الذي يوجه للنجوم من قبل الجمهور؟

Abla Fahita: ​​​​​​​جمهور اليومين دول مش زي جمهور زمان المسكين اللي يتفرج ويسمع من سكات وآخره يبرطم باللي مش عاجبه.. دلوقتي الجمهور مابيرحمش.. بقى صوته عالي ورأيه لازم يتسمع.. الجمهور أخد كورس نقد قصقص شغلانة الناقد الفني وحطها على جنب.. والفنانين مابقوش أعمال فنية وبس.. بقوا تويتس وستوريز وتحدي الكيكي.. فالنقد الفني إتسرسب للموضة والتجميل والفيتنيس والصح والغلط وبقت حوسة نقدية.. وفيه شريحة من الجمهور نقدهم بيقلب بلطجة على الفن والفنانين، دول زمان كانوا بيطردوا من المسرح ودلوقتي مابيتطردوش من فيسبوك بس بيتعملهم بلوك. دول يا حرام بيطلعوا العك والعقد اللي في حياتهم على الناس التانية علشان مايبقوش منكسرين لوحدهم.

 

Elle Arabia: من هو الداعم الأول لك؟ وقدوة تتمثلين بها؟

Abla Fahita: ​​​​​​​احب اشكر الظروف وحسن حظي اللي وقفوا جنبي وادوني الفرصة احول كل مصيبة لسلمة صعود في طريق نجاحي.. أما عن قدوتي ونار شعلتي فهي جدتي الملكة حتشبسوت، يا حبيبتي إترملت ولبست شنب الحكم وإتفرعنت ٢٢ سنة على البلد كلها.. الكل بيحلف بأيامها.. لبست زي الرجل بس أدارت زي الست.. دلعت البلد بحنيتها، فتحت المحاجر، شغلت الشعب وطلعت المجوهرات من الجبال، عملت علاقات تجارية دولية كبرت الأسطول البحري وإفتتحت معابد، وعملت أوردر لأكبر مسلة فرعونية.. عارفة المسلة اللي في باريس في ميدان الكونكورد دي بتاعتها.. كان عندها طقم قطعتين، لطشوا واحدة منهم وقت الحملة الفرنسية وسابوا التانية.. ويا عيني في الآخر ماتت حتشبسوت زينا من السرطان أو السكر مش فاكرة.. الله يرحمك يا جدتي كانت هتتنرفز أوي من قصة المسلة دي.

 

Elle Arabia: ما هو أكبر وأصعب تحدي واجهتيه في مسيرتك؟
Abla Fahita:
​​​​​​​أصعب تحدي واجهته هو تحدي كيكي.. ماكنتش طايلة أكره الباب وأنا نازلة من العربية وكنت هتكعبل وتبقى حوسة.

 

Elle Arabia: ما هي مشاريعك المستقبلية؟ وما هو مستقبل برنامجك؟
Abla Fahita:
​​​​​​​مشاريعي كتير ومابتخلصشي.. عندي مشروع إجتماعي هادف للربح من كبار السن. نظام قبض شهري زي الجمعية كده بس بالورث.. اللي عليه الدور يموت يسيب ورثه للي بعده والجمعية بتاخد نسبة.. وعندي مشروع تاني تعليمي ضخم.. بس ده خايفة لمنى الشاذلي تلطش فكرته.. أما عن برنامجي الجديد فأنا جايلي دعوة أكون حكم في برنامج مدغشقر جوت تالنت - وبفكر بجدية أقبل العرض بس مستنية اعرف الجنية المدغشقري بكام.


Elle Arabia: برأيك ما هو مفتاح النجاح؟ وما هو سر نجاحك وإستمراريتك؟

Abla Fahita: ​​​​​​​مفتاح النجاح إنك تصدق في روحك وتشتغل على نفسك، وسر النجاح هو الشغل.. وعلى رأي المثل اللي أنا مؤلفاه: "خد شغلك بجد حتى لو كان شغلك هزار". أما عن إستمراريتي، فطول ما أنا فريدة من نوعي، بتكلم في اللي محدش بيتكلم فيه، بأنكش في التابوهات، وأخطف الضحكة من الوشوش العكرة.. يبقى أنا مستمرة.

 

Elle Arabia: بنظرك ما هو المعيار الحقيقي والتقييم الصحيح لمن يستحق لقب "نجم"، بحيث الكل من على الساحة الفنية يصنف نفسه بلقب "نجم"؟

Abla Fahita: ​​​​​​​النجم هو من يسطع ومش كل ما يسطع شمس.. فيه مليان لمض.. وساعات موفرة كمان.. إحنا كرام جداً في الألقاب، من كابتن لباشا لأستاذ لباشمهندس لبرنس لرياسة كلها مجاملات سكر زيادة.. ويا خسارة إن أم كلثوم يا حبيبتي راحت وهي يا دوب كوكب وماشافتشي مستويات النجومية اللي وصلنالها دي.

 

Elle Arabia: نلاحظ هناك تردي في الأعمال الفنية (غناء وتمثيل)، على من يقع الحق؟ على الجمهور أو على الفنان؟

Abla Fahita: ​​​​​​​أنا ملاحظة الموضوع ده ومش عارفة ألوم مين فيهم.. بس بصراحة الانحدار من الناحيتين.. الجمهور يا عيني نفسه مش لاقي حاجة عدلة فبيهيص بأي حاجة نص عِدلة قدامه.

 

Elle Arabia: أفضل شخصية حاورتها؟ وهل من شخص تحلمين بمحاورته؟

Abla Fahita: ​​​​​​​انا حاورت شخصيات كتيرة حلوة.. لما بتقعد وتفتح في الشخصية اللي قدامك بتحبها.. حد كان يصدق عمرو مصطفى يطلع دمه خفيف، ولا لميس الحديدي يطلع جواها شريهان؟ أما الشخص اللي فضولي هيموتني وأحاوره هي مرات ماكرون رئيس فرنسا.. الست برچيت برضه مثال فريد لواحدة عرفت تربي جوزها من قبل ما تتجوزه.. ومع بعض وصلوا لرئاسة دولة مهمة في أوروبا والعالم وبقى عندهم أحلى كرواسون.

 

Elle Arabia: من هو فتى أحلام أبلة فاهيتا؟

Abla Fahita: ​​​​​​​فتى أحلامي هو مرحومي. من حبه ليا ماسابنيش حتى بعد ما مات.. بيزورني في أحلامي كل يوم خميس.. يفضل يدلع ويناغش فيا لحد لما روحه تطلع.

 

Elle Arabia: النجم والنجمة الأكثر وسامة في الوطن العربي والغربي؟
Abla Fahita:
​​​​​​​من اللي ماتوا بحب عمر الشريف واحمد رمزي قبل ما يكلبظ.. دول مافيش زيهم. ومن العايشين بأحب مونيكا بلوتشي مايتشبعشي من حلاوتها وبرضك آدم لاڤين يتاكل أكل.

 

Elle Arabia: المرأة الأكثر أناقة (غيرك طبعاً)، في الوطن العربي والغربي؟

Abla Fahita: ​​​​​​​انا بصراحة بتابع الملكة رانيا ومش قادرة امسك عليها غلطة. يا حبيبتي مضبطة بالتنتوفة.. صحيح إحنا الإتنين لبسنا من كريكور چابوتيان.. بس أنا البليسيه عليا أحلى.

 

Elle Arabia: إذا أمكنك توجيه نصيحة للمرأة العربية اليوم، ماذا تقولين لها؟
Abla Fahita:
​​​​​​​شدي حيلك يا ماما انتي قدها وقدود.. لا ده انتي اكبر منها كمان. المهم ركزي جوه نفسك الأول وإفهمي شطارتك فين علشان تفلحي، انتي بس خففي الميك اب شوية وماتسيبيش شعرك يزيت.. وماتنسيش ماسك عسل المانوكا وحبة جنين البركة.

 

Elle Arabia: كلمة أخيرة لقراء Elle Arabia؟
Abla Fahita:
​​​​​​​بأفكركم بمجلة الموعد.. ماتخلوش العولمة تنسيكم ماضيكم.

 

حاورتها فدى رمضان

 

 

تصوير: Bilo Hussein Photography

مجوهرات: Dima Jewellery

ملابس: Kojak Studios 

الحقيبة: Salvatore Ferragamo من Dstore Egypt

منسقة ملابس: Aya Negm

مكان التصوير: Gallery Alef

قد يهمّكِ أيضاً