شارك النجم تامر حسني مجموعة صور له على حسابه على إنستغرام تُظهر مشاركته في توزيع مساعدات لمتضرري إعصار دانيال الذي ضرب ليبيا وتسبّب بأضرار مادية وبشرية جمّة، ولمتضرّري زلزال المغرب الذي أدى إلى وفاة آلاف الأشخاص.
وعلق تامر حسني على الصور بالقول: "مساء الخير عليكم.. شبابنا وكل أهالينا في مصر طبعًا كلنا شوفنا اللي حصل في المغرب وليبيا، وأكيد كلنا في أشد حالات الحزن ونفسنا نعمل حاجة.. كلامي للّي قادر.. واللي مش قادر جزاه الله كل خير لو كثف الدعاء لأهالينا وأخواتنا.. مش هطول عليكم.. يا جماعة عندنا في مصر جمعية الهلال الأحمر المصري بجد ناس لهم الجنة إن شاء الله، أنا فخور بيهم أوي وبحبهم أوي من كل قلبي، دول ناس رحيمة وهبوا حياتهم لخدمة الإنسانية وكل يوم عندهم شباب جميل متطوع لخدمة الإنسانية، الحقيقة أننا بمشيئة الله دايماً معاهم في كل أزمة بتقابل مصر أو أي شعب عربي بس أكيد أنا مش كفاية".
وختم تامر كلمته بالقول: "أتمنى من كل مصري أنه يهتم بالجمعية العظيمة الرحيمة دي ويحاول يقدم أي دعم ولو بسيط ليهم وأتمنى إن اللي ميعرفهمش يحاول يعرفهم كويس عشان لو عرفهم وعرف دورهم وإزاي بيخاطروا بحياتهم عشان سلامة وإنقاذ البشر.. هيبصلهم بنظرة عظيمة. من قلبي كل المواساة لأهالينا في المغرب وليبيا ومن أرض مصر بنقولكم كل مصر معاكم وخالص تعازينا لأسر الضحايا من أهالينا وكل الدعاء لعودة وسلامة المفقودين منهم ربنا يصبركم وحفظكم ويحفظ أمتنا العربية".
